حاجه غريبه و مش مسبوقه

حاجه غريبه و مش مسبوقه

بقلم/ اسامه العاصي 

حاجه غريبه و مش مسبوقه

مشاهد كأنها من السيما مسروقه

كل الناس قاعده في البيت مخنوقه

والناس محتارة ومش فاهمة

مش عارفين امتي الحال هيروق

من شهور بس

كانت كل أمورنا عادية

كانت دنيا غير الدنيا

ننزل ونروح

نكره ونحب بحرية

نزهق بطريقه طبيعية

من شهور بس

من غير ما نحس

زي مانكون انصبنا بنحس

او باللعنة الفرعونية

كل العالم بقي بيحارب

والبشرية في نفس القارب

وماحدش هيقول مش لاعب

دي اللعبة بقت دولية

لعبة نهايتها حياة او موت

حابسين انفاسنا من غير صوت

وعملنا لحياتنا قيود

يمكن خايفين؟

فيه ناس من الخوف بتموت

وبقينا نعّد فى ارقام

كام ماتوا وكام خفوا من كام

واتلخبطت في دماغنا الايام

نصحي ونستني امتي ننام

نصحي ونتمني الدنيا تعود

زي ما كانت

ونقول هانت

زي ماقالوا

لا هيفضل الحال علي حاله

ولا فيه وضع بيفضل علي حاله

او مثلاً جايز في الآخر

ننام ونصحي ونقول ده كابوس

ياريته يطلع حلم او حتي كابوس